As Lebn, des is hoit a stoaniger Weg,
moi steil und dann wieder grod.
Moi is, wia a enga zuagschütta Steg,
moi is, wia a ganz broata Pfod.

Ma plogt si müahsam aam Gipfekreiz zua
strebt nach obn und wui nimma z'ruck
vagißt de Strapazn, gönnt si koa Ruah
bis da Stress oan auf oamoi dadruckt.

Ma zarrt aa oft unnötig vuizvui Ballast
auf den stoanign Weg mit sich rum.
Ma kriagt hoit net gnua, vazicht auf a Rast,
bist di umschaust bist oid, grau und krumm.